Սամվել Կարապետյան և Արմեն Հախնազարյան: Ամենայն հայոց հուշարձանագետները:

Խորհրդային տարիներին, երբ պետականությունից զուրկ Հայաստանը չէր էլ կարող երազել իր ամբողջական բնօրրանի հազարամյա մշակութային ժառանգության վերաբերյալ որևէ տեղեկություն ստանալու կամ, առավել ևս, լայնածավալ գիտահետազոտական ուսումնասիրություններ անցկացնելու մասին, երկու նվիրյալներ՝ Արմեն Հախնազարյանն ու Սամվել Կարապետյանը, անխոնջ շրջում էին հարյուրավոր հայկական (կամ երբեմնի հայկական) բնակավայրերով՝ ամենուր փնտրելով հայի հետքը։
Նրանք հետազոտել, չափագրել և լուսանկարել են հազարավոր հայապատկան հուշարձաններ, վանքեր և ճարտարապետական այլ եզակի կոթողներ՝ այդ ամենը սրբորեն հավաքելով ու պահելով որպես ապացուցահեն մի հսկայական արխիվ հայության գալիք սերունդների համար։